मराठी साहित्य – कवितेचा उत्सव ☆ काय सांगू देवा तुझे… ☆ प्रा. सौ. सुमती पवार ☆

☆ काय सांगू देवा तुझे… ☆ प्रा. सौ. सुमती पवार ☆

☆

काय सांगू देवा तुझे फारच उपकार

सदाच आहे खुले तुझे आम्हासाठी दार

*

पतितपावन आहेस देवा येते प्रचिती

तुझ्यामुळे विश्वाला या मिळते सद्गती

*

ठाई ठाई रूप तुझे दिसते आम्हाला

कशास जावे सांग आम्ही तीर्थक्षेत्राला…

*

पशुपक्षी प्राणी सारे तुझेच ना रूप

व्यर्थ का जाळतो आम्ही यज्ञातून तूप…

*

जळीस्थळीकाष्टीपाषाणी म्हणती आहे

म्हणून मी माझ्यामध्ये नित्य तुला पाहे..

*

श्वास माझा प्राण माझा सर्वस्व तूच

क्षणभर साथ सोडली की होते मग कूच..

*

तरी न डोळे उघडती ना होतो शहाणे

उठसूठ सुरूच असते आमचे गाऱ्हाणे..

☆

© प्रा.सौ.सुमती पवार