प्राची अभय जोशी
कवितेचा उत्सव
☆ मनाचा मागोवा… ☆ प्राची अभय जोशी ☆
☆
असं वाटतं मन एक…
तेवणारी वात व्हावे,
काळोख विझवणारे
मातीसारखे सुपीक व्हावे
सृष्टीला फुलवणारे..
मन एक आधार व्हावे,
कोणाच्या दुःखाचे अन्
खळाळता झरा व्हावे,
आनंद उधळणारे..
मन उंच उडणारा पतंग,
पक्षांसवे विहरणारे
झाडांमध्ये लपलेल्या,
घरट्यात डोकावणारे..
मन एक आकाश व्हावे,
इंद्रधनुसम रंगांचे
रिमझिम सोन सरींना,
ओंजळीत घेणारे.
मन एक कृष्ण व्हावे
गोप गोपींच्या श्रद्धेचे
मैत्रीत भिजलेल्या,
सुदाम्याच्या पोह्यांचे..
मन एक असा मागोवा,
माझे मीपण सरण्याचा
मनाच्या हिंदोळ्यात विसावा,
माझ्या मनातील,
निश्चल भावनेचा…
निश्चल भावनेचा…
☆
© प्राची अभय जोशी
मो 9822065666
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
