श्री सुनील देशपांडे
कवितेचा उत्सव
☆ “माफ करा तात्या…” ☆ श्री सुनील देशपांडे ☆
☆
…माफ करा तात्या आता रहावत नाही.
काही बोलायाचे आहे, गप्प रहावत नाही.
—
काही जाळायाचे आहे, पण जाळणार नाही.
प्रदूषण काट्यावर, गाव तोलणार नाही.
*
माझ्या अंगणात गंध पाना फुलांचा हुंगला.
आता अंगण ते कधी मला दिसणार नाही.
*
माळावरून वाऱ्याचा येई भरारा थंडावा
आता मनोऱ्यांच्या खाली माळ राहिलाच नाही
*
खेळ निसर्ग रंगांचा मन लुभावत असे.
खेळ रक्ताच्या रंगाचा आता पहावत नाही.
*
किती माणसे भोवती नाते कुणाशीही नसे.
संख्या वाढली कितीही कुणी वेळेवर नाही.
*
आता जगू कसे तरी श्वास शिल्लक तोवरी.
श्वास घेण्यासाठी आता शुद्ध हवा सुद्धा नाही.
*
आता हवा तरी ठेवा माझ्या पुढील पिढ्यांना.
त्यांच्या भविष्याचे चित्र मला पहावत नाही.
*
सारा शोषला निसर्ग आता हवा तरी ठेवा.
हात जोडून सांगतो काही जाळायाचे नाही.
*
काही जाळायाचे आहे, पण जाळणार नाही.
प्रदूषण काट्यावर, गाव तोलणार नाही.
☆
© श्री सुनील देशपांडे
email : sunil68deshpande@outlook.com
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
