राधिका भांडारकर
कवितेचा उत्सव
☆ तिची नजर… ☆ राधिका भांडारकर ☆
(वृत्त – पादाकुलक)
☆
हाती होते गुच्छ फुलांचे
“घेता का हो?” विनवत होती
ऊन तापले सोसत चटके
एक बालिका धावत होती…
*
गुंग चिंतेत जो तो होता
कशास कोणी बघावे तिला
का जाणावी गरज भावना
फक्त “नको” चा शब्द राहिला….
*
बाल्य लोपले वणवण आली
भविष्याच्या अंधारी ती
स्वप्नच नव्हते उरले काही
भाकरी एकच हवी होती…
*
कळवळले मी तिला पाहता
खूण करताच धावत आली
घेतली फुले मग ती सारी
डोळ्यात तिच्या रेष चमकली …
*
काय अर्थ हो त्या नजरेचा
मज अजूनही कळला नाही
भाव निरागस त्या डोहाचे
अंतरातले मिटले नाही…
☆
© राधिका भांडारकर
पुणे
मो.९४२१५२३६६९
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/सुहास रघुनाथ पंडित /मंजुषा मुळे/गौरी गाडेकर≈
