प्रतिमा रवींद्र कुलकर्णी
कवितेचा उत्सव
☆ पाऊस असा घनगर्द ☆ प्रतिमा रवींद्र कुलकर्णी ☆
☆
पाऊस असा घनगर्द बरसतो
रातही काजळकाळी
का गीत असे ओठात माझीया
असल्या भलत्या वेळी?
ते रुप पाहण्या नयने आसावली
मनमयूर नाचे वेडावून गोकुळी
मधुसूर बासरी करते मोहक खेळी
मन गंध-धुंद, कानात गुंजती,
आज सख्याच्या ओळी…
घनव्याकूळ भेटी घडल्या कातरवेळी
अन तरंग उठती श्यामल यमुनाजळी
गारुड करीतसे अजुनी तो वनमाळी
का नीज नसे डोळ्यात?
जाळते रात, अशी काजळी…
☆
© प्रतिमा रवींद्र कुलकर्णी
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
