श्री राजकुमार दत्तात्रय कवठेकर
कवितेचा उत्सव
☆ तू नसल्यावर… ☆ श्री राजकुमार कवठेकर ☆
☆
तू नसल्यावर काय करू या जगण्याचे मी
करू किती नाटक हे नसुनी असण्याचे मी
*
उदास हे जग, उदास हे मन, उदास जगणे
तरंग उठवू किती मुखावर हसण्याचे मी
*
अवतीभवती भास तुझे हे नित्य निरंतर
जाच किती सोसू छळण्याचे.. फसण्याचे मी
*
स्वप्न दंशते, फूल टोचते, स्मृती दाहते
पार करावे रान कसे हे वणव्याचे मी
*
अश्रूंचा हा पूर अनावर, ढळे तोल ही
प्रयास निष्फळ करू किती सावरण्याचे मी
*
तू नसल्यावर दाटुन येते सांज मनावर
दुःख भोगतो ढळण्याचे अन् गळण्याचे मी
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
