श्री हरिश्चंद्र कोठावदे
कवितेचा उत्सव
☆ मुक्काम दो घडीचा… ☆ श्री हरिश्चंद्र कोठावदे ☆
☆
मुक्काम दो घडीचा, यात्रा परी निरंत
तो दूर दूर अजुनी, पांथा तुझा दिगंत
*
पक्ष्यास ज्ञात माझ्या, घरटेच दैव त्याचे
पंखांस रोज चळवी, आकाश ते अनंत
*
आभाळ फाटताही, ज्याचा ढळे न तारा
परदु:ख दुःख ज्याचे, तो एक भाग्यवंत
*
तिमिरास तिमिर घेतो, कवटाळुनी उराशी
होतो जराजरासा, काळोख तेजवंत..
*
रानात दाटलेली, हिमरात्र आरपार
सूर्योदयात एका, फुलतो कधी वसंत
*
लावण्य जीवनाचे, घे भोगुनी मनस्वी
व्हावा तुझ्या व्यथांचा, शृंगार शोभिवंत
*
अंतागणीक माझ्या, मी जन्मतो नव्याने
आरंभ हा नवा अन् आता नवीन अंत
(आनंदकंद)
☆
© श्री हरिश्चंद्र कोठावदे
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
