श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३४४
☆ नाटकी मुद्रा… ☆ श्री अशोक श्रीपाद भांबुरे ☆
☆
वर्षाराणी आठवते अन् भिजतो आपण
चकवा देते तिच्याचसाठी झुरतो आपण
*
कर्ज काढुनी इतक्या वस्तू कशास घेतो
दिखावटा अन् किती पसारा करतो आपण
*
किती नाटकी मुद्रा असते पहा आपली
रडता रडता किती नाटकी हसतो आपण
*
चकचकीत हा रस्ता आहे घसरू शकतो
जाणिवपूर्वक त्या रस्त्यावर वळतो आपण
*
कोंबडीस या भिती वाटते आषाढाची
रोज रोज का घरात यांच्या शिजतो आपण
*
देवाने या लालबुंद हे ओठ दिले पण
अजून थोडा रंग लावुनी सजतो आपण
*
मोहाचे या जीवन जाते थांबत नाही
जीवनचक्रामधेच कायम फिरतो आपण
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
