मराठी साहित्य – चित्रकाव्य ☆ खुणावतो मज हळूच चाफा… ☆ सौ.रेणुका धनंजय मार्डीकर ☆

सौ.रेणुका धनंजय मार्डीकर

  चित्रकाव्य  

खुणावतो मज हळूच चाफा… सौ.रेणुका धनंजय मार्डीकर ☆

☆

खुणावतो मज हळूच चाफा

अन् गुपित सांगतो काही 

माझ्यासम तू फुलत रहा ग

फुलत रहा लवलाही

*
फुलपाखरू जणू मजला वाटे 

भुईचंपक हा गोड 

धरणीवरती फुले उमलती 

गंधाची मजला ओढ 

*
देवासम हा श्वेतरंगी पण

वाटे मजला योगी 

देवचाफा कधी समाधीस्थ 

कधी वाटे रमता जोगी 

*

सोनवर्खिल्या रंगामधला

धुंद सुगंधी काया

मला भेटतो पानांमधूनी

अत्तर फाया द्याया

*
कवठी चाफा सुगंध देण्या 

ओंजळ भरुनी उमले 

संगतीत मी त्याच्या अविरत 

कवनांमध्ये रमले 

*
पानांमध्ये लपून बसतो 

हिरवा गंधित चाफा 

जरा शोधता किती फुले ती

दिसतो नुसता ताफा 

*

नागचाफा पिवळा चाफा 

तांबडा ही तो असतो

मनात माझ्या मोहिनी घाली

जिकडे तिकडे दिसतो

☆