सुश्री नीलांबरी शिर्के
चित्रकाव्य
दलदल… सुश्री नीलांबरी शिर्के ☆
☆
कुणाकुणाच्या पायी मखमल
कुणाकुणाच्या पायी हिरवळ
परि बहुतेकांच्या पायाखाली
परिस्थितीची असते दलदल – –
*
दलदल ही अशी भवती बनता
पाय प्रयत्ने एक काढता
दुसरा खोलच रुततो पुरता
चालणे अवघड होऊन जाते – –
*
हात देणेही अवघड होते
एकमेका सहाय्य दूरच राहते
दोघेही पडतील भीती छळते
धडपड करीत बसणे उरते – –
*
खाली बसणे अशक्य असते
उठणेही ते अन् अशक्य असते
चिखलाची असो वा परिस्थितीची
दलदल परीक्षाच आपली घेते – –
☆
© सुश्री नीलांबरी शिर्के
मो 8149144177
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
