रेणुका धनंजय मार्डीकर
चित्रकाव्य
गौरीफुले उमलली… रेणुका धनंजय मार्डीकर ☆
(वर्णसंख्या चौदा, यती आठव्या अक्षरावर)
(भावगीत)
☆
घन धुंद कुंद झाला त्या सावळ्या सुखाने
गौरीफुले उमलली आषाढ पावसाने ||ध्रु||
*
बहु गोड रंग त्यांचे नाजूक पाकळ्यांचे
कधी जांभळे सुखावे रंगात रंग त्यांचे
फुलवंती पंचरंगी ती कातऱ्यांची पाने
गौरीफुले उमलली आषाढ पावसाने ||१||
*
येता सुसाट वारा, वा पावसाची धारा
तनु याची कोमलांगी कोमेजतोय सारा
नाजूक नार भासे गुलमेंदीच्या रूपाने
गौरीफुले उमलली आषाढ पावसाने ||२||
*
किती रंग देखणेसे वाहून श्री गणेशा
अन् तेरडा सुखावे गौरींसवे हमेशा
शंकरपार्वतीसह ही लाभलीत नामे
गौरीफुले उमलली आषाढ पावसाने ||३||
*
कधी जांभळी गुलाबी स्वर्णीम नी कुसुंबी
दवबिंदू येऊनिया त्या पाकळीस चुंबी
मम् गीत ओठी आले त्या रूप लाघवाने
गौरीफुले उमलली आषाढ पावसाने ||४||
☆
© रेणुका धनंजय मार्डीकर
औसा.
मोबा. नं. ८८५५९१७९१८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
