नीलांबरी शिर्के
चित्रकाव्य
☆ लागली माऊलीची ओढ!! ☆ नीलांबरी शिर्के ☆
☆
हाती केशरी पताका
तिचा सनातनी रंग
पाय चालताती वाट
मुखी विठूचे अभंग!!
*
माथी चंदनाचा टिळा
त्यात शोभतसे बुक्का
म्हणा विठ्ठल विठ्ठल
मग पाय पुढे टाका!!
*
गळा तुळशीची माळ
दोन्ही हातामध्ये टाळ
वाट ओसरण्यापायी
खेळू फुगडीचा खेळ!!
*
संथ वाहे चंद्रभागा
वाळवंटी भक्त दंग
करा स्नान अन सारे
वाट पाहे पांडुरंग!!
*
नामदेवाची पायरी
कान्होपात्रेचे ते झाड
भेट घेता संत स्थाना
लागे माऊलीची ओढ!!
*
माथा पावलाशी जाता
स्पर्शे पुंडलिक विट
देह पुण्यवंत होई
सार्थकता काठोकाठ!!
☆
© सुश्री नीलांबरी शिर्के
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
