श्री हर्षल सुरेश भानुशाली
पुस्तकावर बोलू काही
☆ “द नेक्स्ट कॉन्व्हर्सेशन” – इंग्रजी लेखक : जेफरसन फिशर – मराठी अनुवाद : दीपक देवधर ☆ परिचय – श्री हर्षल सुरेश भानुशाली ☆
पुस्तक : द नेक्स्ट कॉन्व्हर्सेशन
– – वाद नको संवाद साधा
आंतरराष्ट्रीय बेस्ट सेलर
लेखक : जेफरसन फिशर
अनुवाद: दीपक देवधर
प्रकाशक : माय मिरर पब्लिशिंग हाऊस, पुणे
पृष्ठे: २८८
किंमत – ३५०₹
तुमचं पुढचं संभाषण तुमचं आयुष्य बदलू शकतं, जर तुम्हाला नेमकं काय आणि कसं बोलायचं हे समजलं तर. लेखक जेफरसन फिशर त्यांच्या सोप्या आणि थेट पद्धतीने सांगतात की, वाद कमी करून संवाद कसा वाढवायचा. तणावपूर्ण प्रसंग असो, हाताळण्यास कठीण व्यक्ती असो किंवा तापलेली चर्चा असो, कोणत्याही परिस्थितीत शांत आणि ठामपणे कसं बोलावं हे या पुस्तकात सांगितलं आहे. योग्य वेळी योग्य शब्द वापरायला शिकलात तर तुमची नाती आणि तुमचं आयुष्य दोन्ही अधिक चांगलं होऊ शकतं.
या पुस्तकातून तुम्हाला काय मिळेल?
वाद जिंकण्याऐवजी संवाद जिंकण्याचं तंत्र
तणावपूर्ण परिस्थितीत शांत आणि आत्मविश्वासाने उभं राहण्याचे मार्ग
स्पष्ट मर्यादा (boundaries) कशा आखाव्यात आणि ठामपणे कसं बोलावं
कमी बोलून जास्त परिणाम साधण्याची कला
संघर्षाचं रूपांतर वादात न होऊ देता तो सोडवण्याच्या प्रभावी पद्धती
मी हे पुस्तक का लिहिलं? लेखकाच्याच शब्दात
मी हे पुस्तक तीन कारणांमुळे लिहिलं आहे,
१. कारण माझ्या सोशल मीडियावरच्या फॉलोअर्सनी याची मागणी केली. माझ्या मते, हे पुस्तक खरं तर त्यांचंच आहे.
२. कारण मला जे माहीत आहे, ते तुम्हाला सांगायचं आहे, ज्यामुळे तुमचा पुढचा संवाद थोडा अधिक चांगला होऊ शकेल.
३. आणि तिसरं, माझ्या आयुष्यातील एक भाग माझ्या मुलांसाठी आणि कुटुंबासाठी, जपून ठेवण्यासाठी.
पण हे पुस्तक उघडण्यापूर्वी एक गोष्ट तुमच्यासमोर स्पष्टपणे मांडू इच्छितो. या पुस्तकातली संवादकौशल्यं ही कुठूनतरी उधार घेतलेली तत्त्वं नाहीत. काहीसा शास्त्रीय अभ्यास, मानसशास्त्र, मेंदूविज्ञान किंवा वर्तनशास्त्र यासारख्या क्षेत्रांमधून आलेले काही संदर्भ असतीलही, पण बाकी सगळं मी स्वतःच्या आयुष्यातून, माझ्या बोलण्याच्या आणि ऐकण्याच्या अनुभवांतून शिकलेलं आहे.
हे पुस्तक तुम्हाला कशी मदत करेल?
मी जरी एक खटला चालवणारा वकील असलो तरी या पुस्तकात तुम्हाला कायद्याचा कुठलाही भाग सापडणार नाही.
हे पुस्तक वकिलीबद्दल नाही, वकिलांबद्दलही नाही.
हे पुस्तक आहे, धाडसाने, उघडपणे बोलायला शिकण्याबद्दल. जे तुमच्या मनात आहे, ते मोकळेपणाने बोलताना जी थोडी भीती वाटते, ती स्वीकारूनही बोलायला शिकण्याबद्दल. जे वाटतंय तेच बोलणं आणि जे बोलताय तेच वाटणं.
ही गोष्ट आहे सोयीपेक्षा धाडस निवडण्याची, जरी हे करताना तुमचा आवाज कापत असला तरीही.
स्पष्ट बोलणं याचा अर्थ दुसऱ्याच्या भावना न जपणं असा नाही. थेट बोलणं म्हणजे स्वतःचा आणि समोरच्याचा आदर ठेवून, आपल्या गरजा स्पष्टपणे मांडण्याचं आत्मविश्वासाने घेतलेलं पाऊल.
ठामपणे बोलण्यासाठी तुमचं व्यक्तिमत्त्व आग्रही असण्याची गरज नाही, योग्य शब्दच तुमचं काम करतील.
हेच शब्द, हेच मार्गदर्शन हे पुस्तक तुम्हाला देईल.
परिचय : श्री हर्षल सुरेश भानुशाली
पालघर
मो. 9619800030
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
