श्री अ. ल. देशपांडे
☆ श्रावण माझ्या मनातला… ☆ श्री अ. ल. देशपांडे ☆
श्रावण मासाच्या विविधांगी वर्णनाच्या पोस्ट प्रसार माध्यमांवर फिरताहेत.
माझ्या मनातही खोलवर दडून बसलेल्या श्रावणाचे रूप आपणांस निश्चित आवडेल असे वाटते ते खालील प्रमाणे…
भरभरून उत्साह ओसंडणारा मास म्हणजे श्रावण मास,
अविरत आनंद देणाऱ्या पर्जन्य धारा म्हणजे श्रावण मास.
गर्द तथा विविध छटांचे हळुवार हिरवेसे पांघरूण घेऊन पहुडलेली वसुंधरा म्हणजे श्रावण मास.
विस्तिर्ण पात्रांच्या दुथडी ओसंडून वाहणाऱ्या सरिता म्हणजे श्रावण मास.
धरित्री ने गिळलेल्या श्रावण सरींच्या अमृताने अंकुरित झालेली पिकं म्हणजे श्रावण मास.
कष्टकरी शेतकऱ्यांच्या चेहऱ्यावरील चैतन्य म्हणजे श्रावण मास.
महादेवाच्या भक्तीच्या गीतांची आर्त हाक म्हणजे श्रावण मास.
पचमढीचा डोंगर चढून शिवाचे दर्शन घेण्याचे पर्व म्हणजे श्रावण मास.
मुसळधार पाऊस पडत असताना घराच्या व्हरांड्यात बसून मनमुराद आनंद उपभोगतांना कृतज्ञ भावनेने जगन्मातेला वंदन करण्याचा मास श्रावण मास.
© श्री अ. ल. देशपांडे
अमरावती
मो. 92257 05884
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
