श्री सुधीर करंदीकर
मनमंजुषेतून
☆ “एक जाहिरात अशीही…” ☆ श्री सुधीर करंदीकर ☆
सध्या जाहिरातींचा सुळसुळाट सगळीकडेच आहे.
रस्त्यावर ठिकठिकाणी मोठमोठ्या जाहिराती असतात. टीव्हीवर जाहिराती असतात. रेडिओ वर जाहिराती असतात. पूर्वी रेडिओ वरती एक कार्यक्रम संपला की एखादी जाहिरात असायची आणि दुसरा कार्यक्रम सुरू व्हायचा.
आता तर गाणं सुरू झालं, की दोन ओळी संपतात आणि जाहिरात सुरू होते. कडवं पूर्ण होतं आणि दुसरी जाहिरात लागते.
आता जाहिरातीचा आणखीन एक छान प्रकार बघूया…
तुम्ही म्हैस ही माझी गोष्ट वाचली असेलच.
बावधन या भागात रहदारीचा रस्ता सुखाने आणि आनंदाने आणि सुरक्षितपणे क्रॉस करण्याकरता तिथल्या मुलाने चौका चौकात आता म्हशी ठेवल्या आहेत.
लोकांची रस्ता क्रॉस करण्याची छान सोय होते, मुलाला छान पैसे मिळतात, म्हशीचा आणि मुलाचा छान व्यायाम पण होतो.
एक दिवस मी त्या मुलाला सहज सुचवले की या म्हशीच्या पाठीवर या भागातल्या लोकांना काही जाहिरात करायची असेल तर ती कापडा वरती लिहून म्हशीच्या पाठीवर झूल म्हणून टाकायची.
दुकानदारांची जाहिरात होईल आणि तुला त्यांच्याकडून पैसे पण मिळतील. आणि त्यामध्ये म्हशीला त्रास असा काहीच नाही.
मुलाला कल्पना पटली आणि लगेच त्याने इम्प्लिमेंटेशन केले.
आता तो त्या म्हशींच्या पाठीवर रोज निरनिराळ्या जाहिराती लिहिलेली कापडाची झूल घालत असतो.
म्हशीबरोबर रस्ता क्रॉस करणाऱ्यांकडून पैसे मिळतातच, आणि आता जाहिरात दारांकडून पण पैसे मिळतात.
मी जेव्हा जेव्हा तिथे रस्ता क्रॉस करण्याकरता जातो, तेव्हा मला म्हशीबरोबर रस्ता क्रॉस करण्याकरता तो माझ्याकडून पैसे घ्यायला नकार देतो. आणि आभार म्हणून प्रत्येक वेळा मला एक छान फुलाचा पुष्पगुच्छ देतो.
पुढे मागे अजूनहि काही नवीन नवीन कल्पना सुचतीलच…
चला बाय बाय, शुभ दिवस
© श्री सुधीर करंदीकर
मो. 9225631100 – ईमेल – srkarandikar@gmail. com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
