श्री मंगेश मधुकर
मनमंजुषेतून
☆ “व्हाट्सअप गॉसिप…” ☆ श्री मंगेश मधुकर ☆
झालं असं की,
कामं आटपल्यावर दुपारी मीनानं प्रियाला फोन केला.
“शंभर वर्ष आयुष्ययं. तुलाच फोन करणार होते.” प्रिया.
“सेम टू यू. सुलभाचं कळलं का” मीना
“ग्रुपमधून बाहेर पडली ते ना”
“हो”
“नेहमीचचं झालयं. जरा मनाविरुद्ध झालं की ही चालली ग्रुप सोडून…”
“फार अहंकारी आहे. स्वतःची मर्जी चालवायला बघते.” मीना.
“घरचे किंमत देत नाहीत म्हणून तर ग्रुपवर नाचत असते. स्वतःचा उदो उदो करून घेते.”
“कायम मोठ मोठया बाता मारत असते. तिच्या पोस्टला कमेंट केलं नाही तर राग येतो. ”मीना.
“स्वतः वाट्टेल ते मेसेज करणार पण इतरांनी कोणते मेसेजेस टाकायचे आणि कोणते नाही हे ही ठरवणार.”
“काही नाही गं. मीच कशी शहाणी दाखवण्याचा प्रयत्न”मीना.
“तसंही सुलभाला लपून छपून मोठेपणा दाखवण्याची सवयच आहे.”
“लक्ष द्यायचं नाही. क्लियर ऑल करायचं”
“सगळेच आपल्यासारखं गप्प बसणारे नसतात म्हणून तर काल कालिंदीनं ऐकलं नाही. पोस्ट डिलिट न करता आपला मुद्दा रेटत राहिली. ”मीना.
“तेच सुलभाला झोंबलं. मेसेज डिलिट करायला सांगितल्यावर लगेच विनीतानं सपोर्ट केला.”
“ते नेहमीचचं आहे. त्यांच गुळपीठ नेहमीच जमतं”मीना.
“तु मला ओवाळ अन मी तुला ओवाळते असं म्हणत ग्रुपवर कौतुक सोहळा चालू असतो. ते पाहून बऱ्याचदा हसू येतं आणि असह्य होतं असं वाटतं की.. ”
“ग्रुपमधल्या अनेकांना तसंच वाटतं. फालतूचे वाद आणि बावळटांच्या नादी लागण्या पेक्षा शांत बसणं चांगलं!!” मीना.
“जाऊ दे ना. आपल्याला काय करायचं. आपण गंमत बघायची.”
“ए ग्रुप बघितला का? सुलभाला परत ऍड केलं” मीना.
“विनीतानं केलं असणार”
“दुसरं कोण!!”
“सुलभाचा मेसेज बघितला का?”
“हो,काय तर म्हणे!! आपली मैत्री जुनी आहे. प्रत्येकाचे स्वभाव,विचार करायची पद्धत वेगवेगळी आहे तेव्हा एकमेकांना जज करण्यापेक्षा रिस्पेक्ट करू. कमेंट करण्याआधी विचार करा”
“त्यावर विनीतानं लगेच रिप्लायही दिला ‘खूप छान विचार!! सगळ्यांच्या फायदा होईल. धन्यवाद सुलभा.!”
“सुरवात स्वतःपासून कर,सुलभा” हा कालिंदीचा मेसेज म्हणजे सिक्सर.”
“हो पण या सिक्सरनं ग्रुपवर नवीन वाद सुरु झाला”
“होऊ दे. आपल्याला फुल टाइमपास…” मीना-प्रिया दोघीही मोठमोठ्यांनं हसायला लागल्या..
—–
वरील संभाषण काल्पनिक असलं तरी त्याला वास्तवाचा आधार आहे.
“व्हॉटसप ग्रुप” हे आता जगण्याचा भाग झालेत. ग्रुपवरच्या पोस्ट,चर्चा मेसेजेस,वाद आणि गॉसिप याचसुद्धा रुटीन झालंय मीना-प्रिया यांच्याप्रमाणेच “दुसऱ्यांचं ग्रुपवरचं वागणं” हाच विषय प्रामुख्यानं असतो.
“व्हॉटसप गॉसिप” चा संसर्ग सगळ्यांनाच झालाय. एवढं मात्र नक्की..
© श्री मंगेश मधुकर
मो. 98228 50034
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
