सूचना/Information
🙏🏻 स्व. पद्मश्री मारुती चित्तमपल्ली 🙏🏻
।। भावपूर्ण श्रद्धांजली ।।
संपादकीय निवेदन —
अरण्यऋषी म्हणून गौरवले गेलेले पद्मश्री मारुती चित्तमपल्ली यांचे नुकतेच दु:खद निधन झाले. वनाधिकारी म्हणून सरकारी सेवेत कार्यरत झाल्यापासून पुढे निवृत्त झाल्यानंतरचा सगळा काळ.. अशी एकूण ६५ वर्षं त्यांनी जंगलातच वास्तव्य केलं होतं, आणि ही त्यांची आवड अपवादात्मक म्हणावी अशीच होती. ‘वन्यजीव अभ्यासक आणि निसर्ग-लेखक‘ म्हणून ते ख्यातनाम होते. वन्यजीव संरक्षणात त्यांचे मोठेच योगदान आहे. “वन्यजीवांसाठी अनाथाश्रम“ ही संकल्पना मेळघाट आणि नागझिरा इथे प्रत्यक्षात उतरवण्यामध्ये त्यांचा मोलाचा सहभाग होता. जर्मन, रशियन आणि संस्कृत या भाषांसह त्यांना एकूण १८ भाषा अवगत होत्या हे त्यांचे आणखी एक वैशिष्ट्य होते. तसेच, पक्षीविज्ञान आणि वन्यजीवनाशी संबंधित अनेक नवीन शब्द, संज्ञा आणि पक्षीशास्त्रीय संकल्पनांची मराठी नावे ही त्यांनी मराठी भाषेला दिलेली देणगीच म्हणायला हवी.
जंगलातले अद्भुत म्हणावे असे प्राणी-जीवन आणि त्यातील बारकावे रेखाटणारी आणि ओघवत्या शैलीत त्या सगळ्या गोष्टींचे वर्णन करणारी त्यांची कितीतरी पुस्तकं म्हणजे सर्वसामान्यांना अगदी वेगळीच आणि अनोखी माहिती देणारा एक चिरंतन असा अनमोल खजिनाच आहे. “चकवा चांदणं“ ही त्यांची आत्मकथा प्रसिद्ध आहे.
पद्मश्री पुरस्काराप्रमाणे, महाराष्ट्र सरकारतर्फे त्यांना “विंदा करंदीकर स्मृति जीवनगौरव पुरस्कार“ प्रदान करून सन्मानित करण्यात आले होते. २००६ साली सोलापूर इथे झालेल्या मराठी साहित्य संमेलनाचे अध्यक्ष पद त्यांनी भूषवलेले होते.
आदरणीय स्व. मारुती चित्तमपल्ली यांना आपल्या सर्वांतर्फे अतिशय भावपूर्ण श्रद्धांजली.
आजच्या अंकात वाचूया.श्री श्री आशिष बिवलकर द्वारा प्रस्तुत आपल्या ओळखीच्या प्राण्यांबद्दल एक वेगळीच माहिती देणारा त्यांच्या एका पुस्तकातला काही अंश ‘प्राणीकोश’.
🙏भावपूर्ण श्रद्धांजली🙏
– संपादक मंडळ,
ई अभिव्यक्ति, मराठी विभाग.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
