मराठी साहित्य – कवितेचा उत्सव ☆ क्षण… ☆ सुश्री सुरेखा चिखलकर ☆

सुश्री सुरेखा चिखलकर

 कवितेचा उत्सव 

☆ क्षण… ☆ सुश्री सुरेखा चिखलकर ☆

क्षण जातात हळूच सरकून

वाऱ्याच्या झुळुकीसारखे,

पण मनात राहतात ठसे

अपूर्ण स्पर्शासारखे..

*

आठवणींना ऊर्जा देते

तिन्हीसांजेची कातरवेळ,

मन उधाण वाऱ्याचे

अदृश्य थेंबाचा चाले खेळ..

*

सांजवेळी मग दूर क्षितिजावर

रंग केशरी अलगद विरून जाई,

डोळ्यांत तरळते एक आसू

ज्याला शब्दांची साथ न मिळे काही.

*

एकांताची साथ सोबत घेऊन

पुन्हा सुरू होतो मनाचा प्रवास,

प्रत्येक श्वासात आहे आठवण

ज्याला नाही कधी पूर्णविराम खास.

*

पुन्हा कधीतरी भेट होईल

या एकाच आशेवर आयुष्य चालते,

हरवलेल्या क्षणांची कहाणी

अशीच रोज मनात गुंफली जाते…

☆

 सुश्री सुरेखा चिखलकर