श्री दिवाकर बुरसे
☆ क्षण सृजनाचा ☆ ‘राग यमन (कल्याण)..’ ☆ श्री दिवाकर बुरसे ☆
देवघरात समईच्या शुभ्र कळ्या फुलल्या आहेत. दीप प्रज्वलित होऊन घराघराला सुवर्णकांती लाभली आहे. चंदन, आगरू, कर्पूराच्या धुपाच्या धुंद गंधाने आसमंत भरून गेलाय्, प्रसन्न झालाय्.
*
अशा समयी शांत होतं क्लांत मन.
कारण, याच वेळी…
स्वराकार घेत असतो “राग यमन!“
🌻 राग यमन 🌻
*
संध्या सरली, हुरहुर विरली, कातर मन सावरले
हिन्यापरी ह्रदयात सखीच्या “यमन” सुमन घमघमले! ।। ध्रु।।
*
काजळ ढाळुन कळ्या दिव्यांच्या पुन्हा प्रफुल्लित झाल्या
नुपूर झंकारीत स्वर्गिच्या स्वप्नसख्या अवतरल्या
तम दवडुनि प्रासाद उजळले, मंगलमय झाले
हिन्यापरी ह्रदयात सखीच्या यमन सुमन घमघमले ।।१।।
*
अलगद शीतल वात बिलगला रजनीगंधेला
जिवापाड जपलेला शिरिचा परिमल घट डुचमळला
वातावरणी कसे अचानक गंधजाल पसरले
हिन्यापरी ह्रदयात सखीच्या यमन सुमन घमघमले ।।२।।
*
दर्पणात निजरूप न्याहळित मुक्त केस सावरले
फुले माळली, कुंडल ल्याली, गळा हार घातले
नयनी काजळ, भाळी कुंकुम, कटी मेखला रुळे
हिन्यापरी ह्रदयात सखीच्या यमन सुमन घमघमले ।।३।।
*
भुरभुर कुंतल, अधीर अंतर, मंतरलेल्या दिशा
“तुझ्यासवे एकांती सखया कशा रंगतिल निशा? “
अशा चिंतनी असता परिचित पदरव कानी पडले
हिन्यापरी ह्रदयात सखीच्या यमन सुमन घमघमले! ।।४।।
*
🙏🏽
© श्री दिवाकर बुरसे
पुणे
संपर्कः ९२८४३००१२५, ९५५२६२९२४५
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
