श्री जगदीश काबरे
☆ क्षण सृजनाचा ☆
☆ सत्य आम्हा उमगले हो… ☆ श्री जगदीश काबरे ☆
माझ्या जवळचा मित्र आणि त्याची बायको हे भिन्न विचाराचे जोडपे आहे. बायको आस्तिक आहे तर मित्र नास्तिक. पण त्या दोघांमध्ये गेली तीस वर्षे कुठल्याही प्रकारचा विसंवाद झालेला नाही. कारण ते दोघेही आपापल्या विचारांचा एकमेकांवर दबाव टाकत नाहीत. त्यांच्यातील हा सुसंवाद मी नेहमीच बघत असतो आणि त्यातून मला त्यांच्याविषयी लिहावेसे वाटले, ते असे…
☆ सत्य आम्हा उमगले हो –जगदीश काबरे ☆
☆
नास्तिक असुन तुला
दर्शनाला नेणारी मी,
माझ्या इच्छेखातर
येणारा तू…
हारफुलांचा भाव करत
ताट घेणारी मी,
दारातल्या भिक्षुकांना
मदत करणारा तू…
रांगेत पुढे जाण्यासाठी
धडपडणारी मी,
देवळाची सुबकता
न्याहाळाणारा तू…
डोळ्यांनी नमस्कारासाठी
तुला खुणावणारी मी,
देवळातले कोरीव काम
अनुभवणारा तू…
देवळातही चपलेची
काळजी करणारी मी,
गरजुने नेली असेल
असा विचार करणारा तू…
आस्तिक आहे मी
आणि नास्तिक तू,
आस्तिकतेचा भास मी
पण खरा आस्तिक तूच…
खरेच देव नक्की
कुणाला पावत असेल,
माझ्यासारख्या आस्तिकाला
की तुझ्यासारख्या नास्तिकाला?
☆
© श्री जगदीश काबरे
मो ९९२०१९७६८०
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
