सौ. पल्लवी ऋषिकेश कुलकर्णी
चित्रकाव्य
☆ बालपणाची नाव कागदी… ☆ सौ. पल्लवी ऋषिकेश कुलकर्णी ☆
☆
पाऊसधारा ओलावत येती
विस्मरणातील पायवाट ती
डोळ्यांपुढती अलगद येती
बालपणाची नाव कागदी
☆
नाव कागदी घडीघडीची
त्यात दडली स्वप्न मनीची
निरागसतेने ती नटलेली
बालपणीची नाव कागदी
☆
घडी घडीतुन स्वप्ने फुलती
आनंदाला नाही गणती
प्रत्येकाच्या मनात वसती
बालपणीची नाव कागदी
☆
मोठे होता विरुन जाती
दूर दूर ती वाहून नेती
भिजून पाण्यामध्ये बुडती
बालपणीची नाव कागदी
☆
पाऊस पडता ओढ लागती
बालपणीची स्वप्ने पडती
पुन्हा नव्याने येते हाती
बालपणीची नाव कागदी
☆
चित्र साभार: सौ. पल्लवी ऋषिकेश कुलकर्णी
© सौ. पल्लवी ऋषिकेश कुलकर्णी
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
Wow bhari lahan panichi aathvan zali