वर्षा राजाध्यक्ष
वाचताना वेचलेले
☆ संध्याकाळचा स्वयंपाक “ कवयित्री : अज्ञात ☆ प्रस्तुती – सौ. वर्षा राजाध्यक्ष ☆
☆
संध्याकाळचा स्वयंपाक हा
वाटतो तितका सोपा नसतो,
सकाळचा एकवेळ परवडला
पण संध्याकाळी नको वाटतो…
*
चारीठाव स्वयंपाकाने दिवसाची
सुरुवात कशी छान होते,
पण संध्याकाळी काय करू
या विचारांनीच धडकी भरते…
*
एक तर सकाळ सारखं
संध्याकाळी नको असतं,
रोज रोज बाहेरून मागवणं
तब्ब्येतीला बरं नसतं…
*
खिचडी तशी सख्खी वाटते
पण रोज कशी करायची ना,
थालीपीठ आणि धिरडी म्हणजे
परत मेहनत आलीच ना…
*
सकाळचा तो वरणभात
थोडा तरी उरलाच असतो,
त्याला पुरवठा काय करू
हा यक्ष प्रश्न सतावत असतो…
*
तेलकट नको तुपकट नको
पुलाव बिर्याणी रोज कशी,
त्याला चालतो नुसता भात ही
पण मला पोळी हवी जराशी…
*
पोळ्यांचा कुस्करा, फोडणीचा भात
तसा सोपा जातो करायला,
पण त्यासाठी सकाळच्या
पोळ्या नकोत का उरायला…
*
उसळी, सोजी, सांजा, उपमा
ह्यांना नाष्यात जागा मिळाली आहे,
ब्रेड, पिझ्झा, सँडविच ह्यांच्या
मैद्याने झोप उडवली आहे…
*
काय करावे सांगा मग
साधी गोष्ट वाटते का?
संध्याकाळचा स्वयंपाक
सांगा तुमची पण झोप उडवतो का?
☆
कवयित्री:अज्ञात
प्रस्तुती: वर्षा राजाध्यक्ष
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
