सुश्री प्रभा हर्षे
वाचताना वेचलेले
☆ “लाखो इथले गुरू…” – कवी : श्री. ग. दि. माडगूळकर ☆ प्रस्तुती – सुश्री प्रभा हर्षे ☆
☆
बिन भिंतीची उघडी शाळा
लाखो इथले गुरू…
झाडे, वेली, पशु, पाखरे
यांशी गोष्टी करू!
बघू बंगला या मुंग्यांचा,
सूर ऐकुया या भुंग्यांचा
फुलाफुलांचे रंग दाखवील
फिरते फुलपाखरू…
बिन भिंतीची उघडी शाळा
लाखो इथले गुरू!
सुग्रण बांधी उलटा वाडा,
पाण्यावरती चाले घोडा
मासोळीसम बिन पायांचे
बेडकिचे लेकरू…
बिन भिंतीची उघडी शाळा
लाखो इथले गुरू!
कसा जोंधळा रानी रुजतो,
उंदीरमामा कोठे निजतो
खबदाडातील खजिना त्याचा
फस्त खाऊनी करू
बिन भिंतीची उघडी शाळा
लाखो इथले गुरू!
भल्या सकाळी उन्हात न्हाऊ,
कड्या कपारी पर्ह्यात पोहू
मिळेल तेथून घेऊन विद्या
अखंड साठा करू
बिन भिंतीची उघडी शाळा
लाखो इथले गुरू!
☆
कवी : श्री. ग. दि. माडगूळकर
प्रस्तुती : सुश्री प्रभा हर्षे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
