सौ. सुचिता पंडित
वाचताना वेचलेले
☆ चमचमीत तोंडीलावणी – कवयित्री: सौ. विद्या विष्णू वेलणकर ☆ प्रस्तुती – सौ. सुचिता पंडित ☆
☆
फोडशी भारंगी आणि तेरे अळू
आषाढात खाल्ले हळू हळू
*
केनी कुरडू शेवगा आणि टाकळा
श्रावणात खाऊन करू मोकळा
*
भेंडी पडवळ दोडका आणि गवार
भाद्रपद अश्विनात याचाच भडिमार
*
भोपळे महाराज कार्तिकात फोडू
वांगी आणि मुळा जोडीला काढू
*
कडवे कुळीथ चवळीचे गावातच शेत.
मार्गशीर्षात उसळ कळणाचाच बेत
*
फणसाच्या कुयरीची भाजी
पौषातच खायची
दारातील तोंडली शेंगा हिरवी केळी
जोडीला काढायची
*
माघ फाल्गुनाला काय
असं म्हणू नका
चिने कणगी कांदे सुरण.
दारातच आहे केळीचा कोका.
*
चण्याची उसळ आणि आंबा डाळ
याची मजा चैत्रात फार
वैशाखाची मजाच आगळी
उकडगरे आणि आमरस प्रत्येकवेळी
*
पावसाळ्याची बेगमी करून
उरलं सुरलं जेष्ठात संपवू
वर्षभर बाजारात गेलोच नाही
आमचं काही अडलं नाही
*
कोकणच्या गृहिणी आम्ही हुषार
टोमॅटोची दादागिरी
नाही चालू देणार नाही चालू देणार!
☆
कवयित्री: सौ. विद्या विष्णु वेलणकर
प्रस्तुती :सौ. सुचिता पंडित
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
