उज्ज्वला केळकर
वाचताना वेचलेले
☆ “मुदतीची ठेव” कवयित्री:नीलम माणगावे ☆ प्रस्तुति – उज्ज्वला केळकर ☆
☆
मुदतीची ठेव
सांभाळावी
आणि ज्याची त्याला
सुखरूप
परत करावी
एवढंच तुझ्या गर्भागारातलं
आणि तुझ्या घरा-दारातलं
माझं स्थान!
कुठलाही धक्का
लागू नये या जाणीवेनं
तू,
डोळ्यात तेल घालून
सांभाळलंस
वाढवलंस
ठाकून ठोकून
बाईपणाच्या साच्यात
गच्च बसवून
ज्याची ठेव त्याला
परत केलीस
नि सुटकेचा श्वास
सोडलास
पण…
ठेव घेणाऱ्याच्या
पात्रतेसंबंधीची तुझी काळजी
तुला अस्वस्थ करायची
यदाकदाचित
लेक परत आलीच तर,
पुन्हा गर्भात
सुरक्षित ठेवण्याची सोय
नसल्याच्या जाणीवेनं
स्वतःच
असुरक्षित व्हायचीस
आणि मग…
ठेवीदारापेक्षा
ठेवीनेच आपले पाय
बळकट करावेत म्हणून
मिळेल तेव्हा
मिळतील तशा
प्रतिकारशक्तीच्या
लसी
टोचत राहायचीस
त्यामुळेच
मी उभी आहे
पाय रोवून!
* * * *
कवयित्री:नीलम माणगावे
प्रस्तुती: उज्ज्वला केळकर
संपर्क – निलगिरी, सी-५ , बिल्डिंग नं २९, ०-३ सेक्टर – ५, सी. बी. डी. – नवी मुंबई , पिन – ४००६१४ महाराष्ट्र
मो. 836 925 2454, email-id – kelkar1234@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
