श्री मंगेश जांबोटकर
वाचताना वेचलेले
☆ पहिली सर… – कवी : भालकवी ☆ प्रस्तुती – श्री. मंगेश जांबोटकर ☆
☆
आळसावलेली सकाळ कशी चिंब भिजून गेली होती,
आज माझ्या सोबतीला पावसाची पहिली सर होती …
*
थेंब एका लयीमध्ये तडतड ताशा वाजवीत होते,
अंधारलेल्या अवकाशाला आणखीन गडद करत होते,
हात पसरून त्या थेंबांना झेलायची इच्छा होती,
आज माझ्या सोबतीला पावसाची पहिली सर होती …
*
दाटलेल्या ढगांनी आकाशी काळी नक्षी काढली होती,
क्षितिजावर शुभ्र बगळ्यांची माळ संथ सरकत होती,
काळ्यावर पांढरे करण्याची निसर्ग किमया और होती,
आज माझ्या सोबतीला पावसाची पहिली सर होती …
*
मधमाती मारव्याचा कोमल रिषभ मनात हुरहूर जागवित होता,
असोशीने पाहिलेल्या वाटेची परत आठवण देत होता,
बाहेर घडणारी ओली किमया आतून भिजवून जात होती,
आज माझ्या सोबतीला पावसाची पहिली सर होती …
☆ ☆ ☆ ☆
कवी : भालकवी
प्रस्तुती : श्री. मंगेश जांबोटकर
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
