उषा नाईक
📖 वाचताना वेचलेले 📖
☆ आत्ताची दिवाळी… कवी : अज्ञात ☆ प्रस्तुती : उषा नाईक ☆
☆
बोलता बोलता सहज मी
दिवाळीचा विषय काढला
एकदम माझ्या मित्राचा
चेहरा पांढरा पडला
तो म्हणाला दिवाळी आली की
हल्ली धड धड होतं
जुनं सारं वैभव आठवून
रडकुंडीला येतं
चार दिवसाच्या सुट्टीत आता
कसं होईल माझं
एवढ्या मोठ्या वेळेचं
उचलेल का ओझं?
मी म्हटलं अरे वेड्या
असं काय म्हणतोस
सलग सुट्टी मिळूनसुद्धा
का बरं कण्हतोस?
काय सांगू मित्रा आम्ही
पाच बहीण भाऊ
कुणीच कुणा बरोबर
बोलत नाही
मी कुठे जाऊ?
आता कुणी कुणाकडे
जात येत नाही
आम्हालाही दोन दिवस
कुणीच बोलावीत नाही
चार दिवस कसे जातील
मलाच प्रश्न पडतो
लहानपणीचे फोटो पाहून
मी एकटाच रडतो
पूर्वीच्या काळी नातेवाईक
बरेच गरीब होते
तरीही ते एकमेकाकडे
जात येत होते
कुणाकडे गेल्यानंतर
आतून स्वागत व्हायचं
सारं काम साऱ्यांनी
मिळून मिसळून करायचं
सुबत्ता फार नव्हती
पण वृत्ती चांगली होती
गरिबी असूनसुद्धा
खूप मजा होती
मुरमुऱ्याच्या चिवड्यामध्ये
एखादाच शेंगदाणा भेटायचा
त्याप्रसंगी आनंद मात्र
आभाळा एवढा असायचा
लाल. हिरव्या रंगाचे
वासाचे तेल असायचे
अर्ध्या वाटी खोबऱ्याच्या तेलात
बुडाला जाऊन बसायचे
उत्साह आणि आनंद मात्र
काठोकाठ असायचा
सख्खे असो चुलत असो
घर गच्च भरलेलं दिसायचा
चपला नव्हत्या बूट नव्हते
नव्हते कपडे धड
तरीही जगण्याची
मोठी धडपड
सारे झालेत श्रीमंत
पण वाडे गेले पडून
नाते गोते प्रेम माया
विमानात गेले उडून
घरा घरात दिसतो आता
सुबत्तेचा पूर
तरी आहे मना मनात
चुली सारखा धूर
पाहुण्यांचे येणे जाणे
आता संपून गेले
दसरा आणि दिवाळीतले
आनंदी क्षण गेले
श्राद्ध. पक्ष व्हावेत तसे
मोठे सण असतात
फ्लॅट आणि बंगल्यामध्ये
दोन चार माणसं दिसतात
प्रवासाची सुटकेस आता
अडगळीला पडली
त्या दिवशी माझ्याजवळ
धाय मोकलून रडली
हँडल तुटलं होतं तरी
सुतळी बांधली होती
लहानपणी तुमची मला
खूप सोबत होती
सुटकेस म्हणली सर मला
पाहुण्याकडे नेत जा
कमीत कमी दिवाळीत तरी ं
माझा वापर करीत जा
सुटकेसचं बोलणं ऐकूण
माझंही काळीज तुटलं
म्हणलं बाई माणसाचं
आता नशीब फुटलं
म्हणून म्हणतो बाबांनो
अहंकार सोडा
बहीण भाऊ काका काकू
मामा. मामी.
ही गोड नाती
पुन्हा जोडा
आणि जगण्याचा
आनंद घ्या
संदुक आणि वळकटीचे
स्मरण आपण करू
दिवाळीला प्रत्येकाकडे एक एक दिवस का होईना जाण्यासाठी
पुन्हा सुटकेस भरू..
☆
कवी : अज्ञात
प्रस्तुती : उषा नाईक
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
