सुश्री मंजुषा सुनीत मुळे
कवितेचा उत्सव
☆ “पंढरीची वारी…” ☆ सुश्री मंजुषा सुनीत मुळे ☆
☆
घण घण घण नभ वाजे.. रुणू झुणू रुणू पवन गाजे
गुणगुणत मनी माझ्या.. भोळी मम भक्ती साजे……
*
आतुर विठू- भेटीला.. ज्ञानराज हे जाती
अवतीभवती त्यांच्या मन माझे दुडदुडे……
*
फिकीर नाही देहाची.. लाजही ना जगताची
देहभान विसरून मन माऊलीस आसावे……
*
पायघड्या घाली धरा.. नभ धरी हे छत माथी
अनवाणी पाऊल मग पुढती पुढती झेपावे……
*
वारा वाजवी संबळ.. जलधारांच्या टिपऱ्या
नामाचा गजर मुखी.. तालातच मन नाचे…….
*
मन धावे अती वेगे.. वाटही मागे पडली
चंद्रभागेच्या सवे हे.. आनंदे मन लहरे……..
*
सगुण रूप माऊलीचे जरी दिसले ना डोळा
चहूकडेच माऊलीचे रूप दिसू लागले…….
मज चहूकडेच माऊलीचे रूप दिसू लागले…….
☆
© सुश्री मंजुषा सुनीत मुळे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
व्वा! मानस वारी छानच रंगली आहे.