श्री राजकुमार दत्तात्रय कवठेकर
कवितेचा उत्सव
☆ सोबत… ☆ श्री राजकुमार कवठेकर ☆
☆
कश्याला हवा सूर्य वा चांदणे
तुझ्या सोबतीने जरी चालणे
*
“असा वागसी का..? ” मला बोलती
दिसेना जगा आपले वागणे
*
व्यथांनी दिले मोकळे वावरू
सुखाच्या घरी सोडले नांदणे
*
कसा कोण मध्यस्थ होईल ही
स्वतःशीच माझे सुरू भांडणे
*
इथे बंद दारे, मनांसारखी
गुन्हा हा जणू ऐकणे.. सांगणे
*
नको शब्द तो जो दुभंगे मना
पुन्हा शक्य नाही नभा सांधणे
*
नसे घोर शिक्षा कुठे याहुनी
मनाने मनाला असे टांगणे
*
खुले पंख होता थिटी ती नभे
घरी.. अंगणी सोड रे रांगणे
*
समाधान देईल शांती मना
हवे ध्यास.. हव्यास ते सांडणे
*
मनोभंग वा ती निराशा नको
नको तर्क.. अंदाजही बांधणे
*
“शिका” व्हा सुखी दुःख व्याधीत ही
शिके-ना तिथे रंजणे.. गांजणे
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
छान गझल