मराठी साहित्य – कवितेचा उत्सव ☆ मी शहिद… ☆ सौ.वनिता संभाजी जांगळे ☆

☆ मी शहिद… ☆ सौ. वनिता संभाजी जांगळे ☆

☆

सिमेवरती लढताना

नाही कुणास कळलो

तिरंग्याचे कफन ओढून

शहिद म्हणून ओळखलो

*

उरावर झेलल्या वारांची

विरमरणाने पुसली व्यथा

तिरंग्यात लपेटल्या देहाची

‘अमर रहें’ झाली गाथा

*

शौर्य आणि पराक्रमाचा

वर्दीस घातला कवळा

वर्दीतल्या मरणाचा तेंव्हा

झाला शहिद सोहळा

*

सुट्टीसाठी किती झंझटी !

लाख लाख लडतडी

तिरंग्यातून चाललो तेंव्हा

पटकन गेटवर जी. डी.

*

प्राणाची बाजी लावूनही

अर्थ नसतो जगण्याला

पण अमुल्य जाणे आमुचे

शहिद होऊन मरण्याला

*

मातीच्या ओढीने येत होतो

गाव मला तवा विसरभोळा

शहिद माझ्या होण्याचा

सन्माननीय हा मरण-सोहळा

☆

© सौ.वनिता संभाजी जांगळे (घागरे)

जांभुळवाडी-पेठ, ता. – वाळवा, जिल्हा – सांगली