प्रा. सुनंदा पाटील
कवितेचा उत्सव
☆ आई आठवते… ☆ प्रा. सुनंदा पाटील ☆
☆
देवाजवळी दिवा लावता आई आठवते
कातरवेळी वाट पाहता आई आठवते
*
रस्त्यावरुनी चालत होते कितीक वेळा मी
उंबरठ्याची ठेच लागता आई आठवते
*
औषध घेते थकून जाते ताप का हटेना
मीठ मोहरी दृष्ट काढता आई आठवते
*
दुःखाचीही गर्दी होते दव पापणकाठी
कढ मायेचे उगा दाटता आई आठवते
*
आयुष्याच्या सायंकाळी मज सोबत नाही
भविष्य बघुनी भिती वाटता आई आठवते
*
दारी माझ्या श्रावणसरही उदास पाझरते
पुन्हा न येणे तिचे जाणता आई आठवते
*
मंदिरातली घंटा घणघण रोजच वाजवते
माझ्यापाशी देव कोणता आई आठवते
*
निघून गेली दूर तरीही आठव तव स्मरतो
आई म्हणुनी हाक ऐकता आई आठवते
☆
गझलनंदा
© प्रा.सुनंदा पाटील
गझलनंदा
८४२२०८९६६६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुंदर गझल