मराठी साहित्य – कवितेचा उत्सव ☆ नवं वर्ष… ☆ सौ.वनिता संभाजी जांगळे ☆

☆ नवं वर्ष… ☆ सौ. वनिता संभाजी जांगळे ☆

☆

जाणारे जुने असते

येणारे नाविन्यानी नटते

तारीख, वार, महिने

आपल्या क्रमानेच येत असतात

येणाऱ्या दिवसाला मात्र

काळाचं लेबल देऊन जातात

पलटलेल्या पानासोबत

काळ पुढे सरकतो

बघता बघता नाही कळत

कधी वर्षाचा शेवट येतो

नव्या वर्षांच्या स्वागताला

एका रात्रीचा जल्लोष होतो

कधी श्वास मुठीत घेऊन

तर कधी कष्टात झिजून

कधी दु:खात कधी सुखात

वर्षातला प्रत्येक दिवस

दिवसातला क्षण क्षण जगला जातो

कधी जीव टांगणीला लावून.

आणि किती सहजतेनी त्याला

आपण टाटा, बाय-बाय करतो

जुनं कॅलेंडर उतरून

भिंतीवरती नवे टांगतो

खरोखर इतके का सोपे असते

जुन्याला सहज घालविणे

नव्याला सहजतेनी स्विकारणे

काळजातला अंधार मिटवून

सुंदर पहाटेला जागविणे

तितकेच सोपे झाले नसते का

आयुष्यात येणाऱ्या प्रत्येक

घटका, दिवस, वार, महिने यांना

तितक्याच सुंदरतेनी नटविणे

☆

© सौ.वनिता संभाजी जांगळे (घागरे)

जांभुळवाडी-पेठ, ता. – वाळवा, जिल्हा – सांगली