मराठी साहित्य – कवितेचा उत्सव ☆ कुसुम ज्योत… ☆ श्रीशैल चौगुले ☆

श्रीशैल चौगुले

 कवितेचा उत्सव 

☆ कुसुम ज्योत… ☆ श्रीशैल चौगुले ☆

☆

कुसुम सुवर्ण ज्योत झळकते

पाचूंनी धरेचे अंगण सजते

*

स्पर्शाने धुंद लताकांती शहारे

तेजोमय शृंगार सृष्टी हसते.

*

चांदण पांघर झटकून नभ

हरिते प्रांजळ ओहोळ जाग्रते

*

डोंगर घाटी उजळून निघता

उषा देवता मृदमुख पुजते.

*

पुर्वदिशा क्षितीजास खुलविती

गाई हाकितो वनी कृष्ण भासते

*

तृणटोकी दव कळस होऊनी

पर्णपताके जणू टाळ भजते.

*

समई वात हळू तेवीत अग्नी

पंख पसरुनी भूमाता भिजते

*

चतुर्भुजांना नवचैतन्य भरे

समुह स्वरात कलकल गाते.

*

किरणकळ्या उघडूनी पुष्पांचे

प्रभात सुकुमार भाव प्रसूते

*

आत्मजीव ब्रम्हांडी क्रिया इंद्रिये

सरोवरी अणू हिरकण लेते.

 ☆

© श्रीशैल चौगुले