श्री राजकुमार दत्तात्रय कवठेकर
कवितेचा उत्सव
☆ गांव… ☆ श्री राजकुमार कवठेकर ☆
☆
कोठे असेल ते गांव जिथे आहे पोचायचे
कशी गांवची त्या वाट जिच्यावरून जायचे
*
कसे असेल ते गांव? भग्न? भकास? समृद्ध?
सप्तसूरांत भिजले? की ते असेल नि:शब्द?
*
असतील का सोबती? का तो भयाण एकांत?
जीणे असेल का तृप्त? समाधानी आणि शांत?
*
लळा इथला तरीही आहे हंगामी मुक्काम
जरी सुखवस्तू तरी आहे भाडोत्री हे धाम
*
असो कसेही ते गांव आणि गांवची त्या वाट
कधीतरी सोडावी ही लागणार वहिवाट
☆
© श्री राजकुमार दत्तात्रय कवठेकर
कवी / गझलकार
संपर्क : ओंकार अपार्टमेंट, डी बिल्डिंग, शनिवार पेठ, आशा टाकिज जवळ, मिरज मो ९४२११०५८१३
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
