श्री प्रमोद वामन वर्तक
कवितेचा उत्सव
☆ 🕺 शब्द, देह, रोमांच! 🙏 ☆ श्री प्रमोद वामन वर्तक ☆
☆
जड बोजड शब्दांचा
नको कवितेत पसारा,
साध्या सोप्या शब्दांनी
फुलू दे तिचा पिसारा!
*
यमक वृतांचा उगीच
हवा कशास अट्टाहास,
भावार्थ त्यात दडला
हृदयी भिडावा खास!
*
अर्थ भिडता हृदयाला
डोळे भरून यावेत,
तिला उचलून प्रेमाने
हळूच घ्यावी कवेत!
*
संपता अर्थगर्भ रचना
काटा अंगावरी फुलावा,
होता रोमांचित अंग अंग
सारा देहची शब्द व्हावा!
सारा देहची शब्द व्हावा!
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
