अपर्णा परांजपे
कवितेचा उत्सव
☆ 
॥ अंतर्बोध ॥ ☆ अपर्णा परांजपे ☆
☆
सिंहावलोकनी दृष्टी, सृष्टि कर्ता ब्रह्मा असे
संकल्प “मनाचा” असे सृष्टी तशी प्रगटतसे
*
परब्रह्म परमात्मा पुत्र त्याचा ब्रह्मदेव
सृष्टिनिर्माता हा दृष्य पिता “स्वरुप, नाव”..
*
कल्पनेचा खेळ हा कुशल मन हे चंचल
सत्य जाणण्यासाठी खेळ असे मंगल
*
पिंजरा हा कल्पनेचा, कल्पनेने रे सजे,
मीच माझा कैदी येथे, मीच माझे बंध जे.
*
भ्रामक या ओळखींचे, लेऊनी मी वेष्टण,
विसरलो मी कोण आहे, विसरलो मी ‘स्व’पण..
*
स्मृतिंच्या या सावल्यांनी, ग्रासले वर्तमाना,
धावतो मी अतीताच्या, शोधण्या “त्या” खुणा.
*
भविष्याच्या “कल्पनेतच” रंगले माझे मन
वर्तमानाचा ना “विचार”शांतता नाही क्षण
*
दृष्टिला या धूसरतेचे, लाभले जे अंजन,
सत्य काही दिसेना अन, व्यर्थ हे रे रंजन
*
शांत होता क्षणभर, बघतो मी मजकडे,
उकलती मग हळूहळू, गुंतागुंतीचे कडे.
*
ना निवाडा, ना समर्थन, केवळ ही “जागृती”,
साक्षी भावे पाहता ही, विरून जाते “आकृती” (कल्पनेचा देहभाव)
*
मुक्त नभ हे अंतरीचे, मौन ज्याचे सार हो,
समजुतीचा दीप उजळे, तुटती हे पाश हो.
*
करुणा उगमते अंतरी, भेद सारे लोपती,
“स्वयंप्रकाशी” होऊनी आता, जीवना लाभे “गती”…
☆
🙏 कृतज्ञ मी कृतार्थ मी 🙏
🌹 भगवंत हृदयस्थ आहे 🌹
© अपर्णा परांजपे
कात्रज, पुणे मो. 9503045495
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
