श्री तुकाराम दादा पाटील
कवितेचा उत्सव
☆ मनाला… ☆ प्रा तुकाराम दादा पाटील ☆
☆
मोजके बोलणे भावते मनाला
शांतता नेमकी भेटते मनाला
*
सोहळा केवढा वाटतो सुखाचा
प्रार्थना ईश्वरी सांगते मनाला
*
साधना साधता बातमी कळावी
देवता कोणती पावते मनाला
*
नेहमी हासणे वाजवी कशाला
लाजरे वागणे जिंकते मनाला
*
कोणत्या बंधनी बांधता कुणाला
मुक्तता संपणे बोचते मनाला
*
शेवटी सांगणे चांगले असावे
आपदा संपली वाटते मनाला
*
वासना आंधळी पाहते जगाला
वैभवी लोळणे मागते मनाला
*
कायदा सारखा मागतो पुरावा
साक्ष खोटी किती झोंबते मनाला
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
