मंजुषा सुनीत मुळे
कवितेचा उत्सव
☆ “भक्ती…” ☆ मंजुषा सुनीत मुळे ☆
*
निळे नि सावळे.. दाटले आभाळ
त्यावर बगळ्यांची.. डुले ही माळ…
*
चांदणी एकली.. हळू उजळे
जणू देव्हाऱ्यात.. दीप पाजळे…
*
अवचित मातीचा.. गंध दरवळे
पूजेसी जाहले.. सज्ज हे सगळे…
*
राहिली आता.. नैवेद्य वाटी
भावभक्ती फक्त.. पुरे त्यासाठी…
*
प्रकटे मेघात.. कृष्ण सावळा
विठू सावळा.. की राम सावळा…
*
मनी जरी रूप.. वेगवेगळे
परब्रह्म नभी.. एकवटले…
*
सावळे गोजिरे.. रूप साजिरे
होई प्रसन्न नि.. कृपा पाझरे…
*
चिंब भिजावे.. भक्तांनी त्यात
जपावी भक्ती ती.. नित्य मनात…
☆
© मंजुषा सुनीत मुळे
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
मंजूषा ताई खूपच सुंदर कविता