श्री तुकाराम दादा पाटील
कवितेचा उत्सव
☆ गूढ… ☆ प्रा तुकाराम दादा पाटील ☆
☆
मानवतेवर देवदयेची
अखंडअविरत पाखरं असते
भूतदयेच्या ओलाव्याने
खडतर जीवन हिरवळ बनते
*
देह मानवी भाड्याचे घर
परमात्म्याला कायम जपते
जन्ममरण हे कालचक्र पण
गरगर भरभर फिरत राहते
*
आळवावरचा थेंब दवाचा
होऊन होती खूप चमकते
रविकिरणांच्या सहवासाने
त्यांचे सुध्दा भाग्य उजळते
*
दिल्या घेतल्या शब्दांनी तर
चराचरांशी जुळते नाते
वचनपूर्तीच्या आत्मसुखाला
ऐश्वर्याचे कोंदण मिळते
*
काय कमावले काय हरवले
स्वार्थी मन हे गणित करते
मोक्षा दरी उभे राहुनी
परमेशाला दान मागते
*
अवकाशाचे गूढ कळेना
कुठली शक्ती इथे नांदते
येता जाता शोधा थोडे
हेच चिरंतन विश्व सांगते
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
