सुरेखा चिखलकर
कवितेचा उत्सव
☆ हिशोब प्राक्तनाचा… ☆ सुरेखा चिखलकर ☆
☆
भावना जेव्हा ओढाळ झाल्या
थकला भागला जीव
भावनांना कुशीत घेऊन
प्रसवत राहिला शब्द न शब्द
भोगलेल्या आठवांचे गाठोडे
विझणाऱ्या सांजेला आठवून
काही जखमा माफीची
परवानगी देत नाहीत तर
विद्यात्याच्या हिशोबाने घडून
द्यावे सारं काही अन्
काळजाला सोलून आपणही
प्राक्तन म्हणून भोगून घ्यावं
सांजेचे कवडसे अन्
पापण्या मात्र आभाळ होतात
आसवं पाझरू लागताच मलाच
हरवाया शब्दांची धार होऊन
विझल्या राखेवर मग
शांततेची अत्तरे सांडावीत अन्
शब्दांच्या वेदनांनी मूठमाती
द्यावी मातीच्या त्या देहावर…
🙏
© सुरेखा महिपती चिखलकर
गोटखिंडी, तालुका वाळवा
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
