श्री तुकाराम दादा पाटील
कवितेचा उत्सव
☆ बाजार… ☆ प्रा तुकाराम दादा पाटील ☆
☆
विसरू नका कुणीही गतकाळ वैभवाचा
ठेवा जपून ठेवा मागील वारशांचा
*
आनंद शोधणारा दिसला कुणीच नाही
चुकलाय आज थोडा अंदाज धोरणांचा
*
जमला जमाव पुढचा भिजलाय भावनांनी
पाऊस बरसला ना नुकताच भाषणांचा
*
सजली किती दुकाने आनंद वाटणारी
पाहून घ्या जरासा बाजार देवळांचा
*
रानात श्वापदांची झालीय आज मैत्री
माणूस आज वैरी झालाय माणसांचा
*
आली सखीच आहे ती अंगणात माझ्या
आवाज ऐकला मी अलवार पावलांचा
*
विकणार काय आता सांगा तुम्ही स्वतः ला
देतो दलाल मोठा माझ्याच भरवशाचा
*
इथला रिवाज साधा आहे अजून बाकी
भोगायचाच असतो तो शाप पातकांचा
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
