राधिका भांडारकर
कवितेचा उत्सव
☆ पहाट… ☆ राधिका भांडारकर ☆
(उद्धव वृत्त २-८-४)
☆
दिनमणी अंबरी येतो
विहगांचा कलरव होतो
राऊळी घंटा घुमते
ती पहाट सुंदर असते..
*
ते दव पाती ओघळते
भासती जणू मोती ते
दाटते धुकेही शिखरी
ती वाट दिसेना नजरी..
*
केशरात न्हाते प्राची
किरणे हिरण्यगर्भाची
दिन नवा आणतो आशा
तिमिरातुनी ने प्रकाशा ….
*
गोठ्यात गाय हंबरते
पाडसे सडांशी लुचते..
अंगणी फुलसडा सांडे
वृंदावनी तुळस नांदे
*
ही पहाट ऊर्जा देते
मज ध्येयापाशी नेते
ते थकणे सारे नुरते
मन पुन्हा एकदा स्फुरते
☆
© राधिका भांडारकर
पुणे
मो.९४२१५२३६६९
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/सुहास रघुनाथ पंडित /मंजुषा मुळे/गौरी गाडेकर≈
