श्री हरिश्चंद्र कोठावदे
कवितेचा उत्सव
☆ शब्द कवीचा… ☆ श्री हरिश्चंद्र कोठावदे ☆
☆
वाऱ्यावरची वरात नाही शब्द कवीचा
आभाळाचा सांगावा हो शब्द कवीचा
*
उथळ जळाचा खळखळाट हा नाही केवळ
खूप खोलवर नेई रसिका डोह कवीचा
*
कृतार्थ केले दैवी देणे जपातपाने
मंत्रमान्य तो अखेर झाला शब्द कवीचा
*
विसरुन वेदन विरुप पदांचे फुले पिसारा
हिरव्या रानी असा नाचतो मोर कवीचा
*
फटफटली ना पहाट कधीहि ज्यांच्यावरती
नव अरुणोदय त्यांच्यासाठी शब्द कवीचा
*
बर्फगार जे, मरगळलेले, मालवलेले
दे संजीवन पुन्हा तयांना मंत्र कवीचा
*
काळजातले रक्तथेंब हे अक्षर अक्षर
जाळामधले टिपुर चांदणे शब्द कवीचा
*
अमानुषाची शिकार करणे बंधनकारक
लक्ष्य आपुले अचूक टिपतो बाण कवीचा
*
दृष्टिपारची अनन्यसुंदर अद्भुत सृष्टी
त्या दुनियेचा वाटाड्या हा शब्द कवीचा
*
मरणशरण तो अखेर असतो जन्म कवीचा
मृत्युंजय पण अंती होतो शब्द कवीचा!
(अनलज्वाला)
☆
© श्री हरिश्चंद्र कोठावदे
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
