मराठी साहित्य – कवितेचा उत्सव ☆ नाश अस्तित्वाचा… ☆ डाॅ. निशिकांत श्रोत्री ☆

डाॅ. निशिकांत श्रोत्री 

 कवितेचा उत्सव  

☆ नाश अस्तित्वाचा… ☆ डाॅ. निशिकांत श्रोत्री ☆

☆

गर्भस्थ गर्भाशयाचा अंत जाहला

मानवाच्या अस्तित्वाला घोर लागला ||ध्रु||

*

पोसुनिया उदरात

नवमासाचे ते व्रत

नाही क्लेषा जुमानत

जन्म द्यायला उद्युक्त

जाण तिच्या त्यागाची परी विसरला

गर्भस्थ गर्भाशयाचा अंत जाहला ||१||

 *

संस्काराने मढविले

बाळकडू त्याला दिधले

वक्षामृत ही पाजले

रात्रंदिन जोपासले

घोट तरी तिच्या जीवाचा हो घेतला

गर्भस्थ गर्भाशयाचा अंत जाहला ||२||

* 

शौर्याने देशा राखले

विज्ञाने-ज्ञाने उजळले

कर्तृत्वाचे पंख फुटले

अबला तिजला दुषायाला तो धजावला

गर्भस्थ गर्भाशयाचा अंत जाहला ||३||

(निशिगंध)

☆

© डॉ. निशिकान्त श्रोत्री

एम. डी. , डी. जी. ओ.