जयश्री पाटील
कवितेच्या उत्सव
☆ अनमोल नाते… ☆ जयश्री पाटील ☆
☆
येताच या जगी तू आनंद फार झाला
सर्वांग सुंदर आई शब्द बहाल झाला
*
लाभताच मातृत्व हे धन्य मी जाहले
अलौकिक नात्यात अलगद गुंतून गेले
*
हातात घेताच तुजला गगन ठेंगणे झाले
रूप तुझे पाहता मी स्वतःच विसरून गेले
*
कुशीत घेता तुजला वाटे स्वर्ग जणू लाभला
इवल्याशा ओठात तुझ्या अमृत पान्हा झरला
*
दिवस रात्र जणू काही समसमान झाले
सभोवती तुझ्या माझे सारे विश्व सामावले
*
मिठीत विसावता तुझे बाळरूप गोजिरे
फिके वाटती मज आकाशातील चंद्र तारे
*
अनमोल तू खास तू फक्त माझे बाळ तू
मानवाच्या निर्मितीतला माझाच गर्व तू
*
विरल्या प्रसव वेदना तोडली जरी नाळ
जोडली आहे काळजाची काळजाशी नाळ
☆
© जयश्री पाटील
विजयनगर.सांगली.
मो.नं.:-8275592044
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित / मंजुषा मुळे/ गौरी गाडेकर≈
