सौ. रेणुका धनंजय मार्डीकर
चित्रकाव्य
गुलबक्षी… सौ.रेणुका धनंजय मार्डीकर ☆
☆
तिन्ही सांजेला दिसते झाडा झाडावर नक्षी
येते स्वागताला पहा उमलून गुलबक्षी
*
वेळ अजबच हिची श्रावणात बहरते
भादव्यात गणेशाच्या अंगावर लहरत
चंद्रकंठ म्हणतात चंद्रप्रकाश हा रक्षी
येते स्वागताला पहा उमलून गुलबक्षी
*
देशामध्ये विदेशात आहे खूप हिची ख्याती
संध्या मालती होऊन नित्य बहरत जाती
कधी गुलाबी पांढरी वेधतसे जणू लक्षी
येते स्वागताला पहा उमलून गुलबक्षी
*
कोणी जांभळी चमेली, बहुरंगी निशाचर
कुठे असरुमा नामे कुठे सूर्यास्त सुंदर
मधु कण हिच्यावर गोळा करी मधुमक्षी
येते स्वागताला पहा उमलून गुलबक्षी
*
कुठे रात्रीची ही राणी आणि गोधुली गोपाल
हिच्या संगतीत रमे सानथोर किती काल
शांत निशांत वेळेला सूर्य चंद्र हिच्या कक्षी
येते स्वागताला पहा उमलून गुलबक्षी
☆
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
