नीलांबरी शिर्के
चित्रकाव्य
☆ सुगंधाची भूल!! ☆ नीलांबरी शिर्के ☆
☆
दोरा दोरा सांधून
फुले एकत्र बांधुन
तयार सुंदर वेणी
ठेवली बुट्टीत मांडून!!
*
सुईत दोरा ओवून
कळी दांड्यात टोचून
ओरडली असेल कळी
खुपतंय ना म्हणून!!
*
त्याच जखमेतुन दोरा
सरपटत येई सामोरा
सुईमागून जावंच लागे
काय करेल बिचारा!!
*
ह्रदयात एक जखम
तरी हसत असतं फुल
जवळ येणाऱ्याला पडे
फक्त सुगंधाची भूल!!
*
फुलांचा राजा गुलाब
रुबाबात असे मोकळा
नजर पडता फुलांवर
सुखाचा उत्सव आगळा!!
☆
© सुश्री नीलांबरी शिर्के
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
