डॉ. सोनिया कस्तुरे
चित्रकाव्य
– “शिवार पंढरी…” – ☆ डॉ.सोनिया कस्तुरे ☆
☆
मोटेचा आवाज | प्रवाह पाटाचा
झुळूका वाऱ्याचा | पांडुरंगा ||१||
*
कांदा मुळा भाजी | गाते हिरवाई
आमुची विठाई | काळी माय ||२||
*
टाळ मृदुंग ना | साथीला चिपळी
औत बैल गळी | तालामध्ये ||३||
*
चंद्रभागा माझी | नाचते शिवारी
शिवार पंढरी| भासे जणू ||४||
*
वारी चालू वाटे | भेटावया तुला
म्हैस बैल गाया | साद घाली ||५||
*
सौख्य पंढरीचे | शिवारी खुलते
तुकोबा मनी ते | जनाबाई ||६||
*
पावसाच्या सरी | ओंब्या धान्य धरी
इथेच पंढरी | विसावली ||७||
*
सोनिया म्हणे हा | विठू मी पाहिला
शिवारी थाटला | निसर्गात ||८||
☆
© डॉ.सोनिया कस्तुरे
विश्रामबाग, जि. सांगली
भ्रमणध्वनी:- 9326818354
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
