श्री नंदकुमार पंडित वडेर
प्रतिमेच्या पलिकडले
☆ # तो एक बाप माणूस असतो # ☆ श्री नंदकुमार पंडित वडेर ☆
आपल्या मुलांच्या स्वप्नांना सत्यात उतरायला आजन्म आपला खस्ता खात जगतो…
दारिद्र्यानं नाडलं गरिबीनं जखडलं आणि संधीसाधू मालकानं लुबाडलं तरीही हतबलता संपता संपत नाही..
त्याच्या लेखी सूर्य उगवतो तो चला कामाला लागायची वेळ झाली इतकचं सांगतो.. आणि
चंद्र चांदण्यांची रांगोळी रजनी जेव्हा निळ्याशार आभाळात रेखते.. तेव्हा मालक आपल्या गड्यांना सांगतो.. गड्याहो मला आता लै झोप आली.. तवा उद्या सकाळच्या पारी लवकर या… असं म्हणताना आजच्या कमाईचे पैसं त्यांना देतो… ठरलेल्या पेक्षा ते कितीतरी कमी असतात… निदान आजच्या हमालीत रगत जेव्हढं आटवलं त्याच्या किमती एव्हढी तरी बिदागी हातावर टेकावयाची होती… पण नाही ना.. तशी सगळी बिदागी एकटाकी दिली तर लेकाचे गडी माजले जातील मस्तीला येतील… मग उद्याला हमालीला धतुरा दाखवून पुढं नाहीच आले तर धोका कशाला ओढवून घ्या… मालकाचा बेरकी विचार नेहमीच मजदूरीत काटा मारून ठेवत असतो..
मग जाशील कुठे तू रे चोरा… कष्टापुढे कसा दाखवशील तुझा तोरा…
घरात जोपासलेली असतात त्या बापानं उद्याची सोनेरी स्वप्नं… पाहत असतो आजच्या काटेरी कष्टाला येणारी सुंगधाची गुलाबी सुमनं..
पडू दे किती भारावर भार पेलायला हा बापाचा खांदा असतो कि नेहमीच तयार… असलो अडाणी निरक्षर मी जरी, पोरावो तुम्हाला शिकविल्या शिवाय हा गडी आता माघार नाही घ्यायचा. जे जे मागाल ते ते देईन मग भले त्यासाठी जिवाला ओलिस ठेवीन… पर तुम्ही एक एक शाळंची इयत्ता पार करत पुढं पुढं जाताना पाहून मन माझं आनंदानं फुलून येईल… दिसावे तुम्हाला सुखाचे दिवस हाच एक मनी ध्यास माझ्या… अन शेवटचा दिस गोड व्हावा हिच आहे एकमेव आशा…
तो एक बाप असतो… बाप माणूस असतो.. वरवर राकट दिसतो आणि आतून हळवा प्रेमळ असतो..
© श्री नंदकुमार इंदिरा पंडित वडेर
विश्रामबाग, सांगली
मोबाईल-99209 78470 ईमेल –nandkumarpwader@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
