डॉ अभिजीत सोनवणे
© doctorforbeggars
☆ डॉक्टर फॉर बेगर्स ☆ “कुणी रद्दी देता का रद्दी…?” ☆ डॉ अभिजीत सोनवणे ☆
भिक्षेकरी म्हनून जगलो, आता काम करून
गावकरी होयाची आलीया संधी…
नशिबानं थट्टा केली,
मानुस म्हनून जगायची केली व्हती बंदी….
आता गावकरी होयाची आलीया संधी…
कुणी रद्दी देता का रद्दी…?
पेपरापसनं ब्याग बनवतो, फिरू फिरून इकतो
आता भीक न्हायी मागत शहरामंदी…
गावकरी होयाची आलीया संधी…
कुणी रद्दी देता का रद्दी…?
ल्येकरं रस्त्यावर टाकून सोडून गेली,
माऊली तुमी तरी नका करू गावबंदी
गावकरी होयाची आलीया संधी…
कुणी रद्दी देता का रद्दी…?
साखर होती तवा आई बाबा म्हनत मुंगळे चिकटले
साखर संपली आनी आमी पडलो उकिरड्यामंदी…
गावकरी होयाची आलीया संधी…
कुणी रद्दी देता का रद्दी…?
(“मध्यरात्रीचे सूर्य” हा भिक्षेकर्यांच्या पुनर्वसनासाठी सुरू केलेला प्रकल्प! इथे अंध, अपंग आणि वृद्ध आई-बाबा आणि आजी आजोबा रद्दीतील पेपर पासून बॅग बनवतात, आपण त्याची विक्री करत आहोत आणि त्यातून मिळणारा निधी हा प्रत्येक आई-बाबा आजी-आजोबांना दररोज पगार म्हणून सन्मानाने देत आहोत, माणूस म्हणून जगण्याची संधी देत आहोत)
आपली रद्दी, रस्त्यावरील आई-बाबांना जगण्याची देणार आहे एक संधी…
© डॉ अभिजित सोनवणे
डाॕक्टर फाॕर बेगर्स, सोहम ट्रस्ट, पुणे
मो : 9822267357 ईमेल : abhisoham17@gmail.com,
वेबसाइट : www.sohamtrust.com
Facebook : SOHAM TRUST
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
